උපදිනකොට ඔබ අරන් එන වාහනය මෙන්න.

0
374

වාහනයක් ගන්න එක බොහෝදෙනකුගේ සිහිනයක්. ඒ සිහිනය සැබෑ කරගන්න විවිධ උත්සාහයන් දරන්නට බොහෝ පිරිසක් කටයුතු කරන ආකාරයක් දැකගන්න පුළුවන්. ඒ වගේම වාහන නිසා දියුණු වූ අය සේම වාහන නිසා විවිධ ගැටලුවලට මුහුණදුන් අයත් සමාජයේ අනන්තවත් දක්නට ලැබෙනවා. ඇතැම් අය වාහනයක් ගැනීම සිහිනයක් සේ සිත සිතා සිටින අතරේ අලුත්ම වාහනයක් ලබා ගන්නට ලොතරැයි දිනුම් වැනි වාසනාවන් පෑදෙයි. එසේම සමහර කෝටිපතියන්ටද වාහනයක් ගන්නට සිත් නොදෙන තැන්ද දැකගත හැකිවෙයි. මේ සියලු කාරණාවලට හේතුව ජන්ම පත්‍රය තුළින් ඉතා පැහැදිලිව හඳුනාගත හැකිය. ජ්‍යොතිෂයට අනුව වාහන ලාබ කේන්දරයේ සටහන්ව තිබේ. එසේ සඳහන් වූ වාහන ලාභ කොයි කොයි ආකාරයෙන් සිදුවේද, මොන මොන වාහන ලැබේද යන්නත් හඳුනාගත හැකි සිද්ධාන්ත කේන්දරේ සටහන්වේ. එසේම වාහන මිලදී ගෙන දියුණුවේද එම වාහනවලින් ජීවිතය සාර්ථක කරගත හැකිද ආදී විවිධ කරුණුත් කේන්දරයේ සටහන්ව තිබේ. මේ සියල්ලට පොදුවේ වාහන ලාභ ලෙස හඳුන්වයි.

යම් ජන්මියකුගේ ජන්ම කේන්දරයේ 4 වැනි භාවයේ වාහන ලාභ ගැන පෙන්නුම් කෙරේ. වාහනවලට කාරක ග්‍රහයා වන්නේ සිකුරුය. වාහන ලාභ ගැන විමසීමේදී හතර අධිපති ග්‍රහයා සහ සිකුරු ගැන සොයා බැලිය යුතුය. සිකුරු ග්‍රහයා හතර අධිපති සමඟ සිටී නම් එය සාමාන්‍ය වාහනයක් ලැබීමට හේතුකාරණා වන ග්‍රහ පිහිටීමකි. එහිදී සාමාන්‍ය වාහනයක් යනු පවුලේ පාවිච්චියට සුදුසු වාහනයක් ගැන කියවෙයි. වෑන් රථයක්, කාරයක් වැනි වාහනයක් ඊට අනුමාන කළ හැකිය.

ජන්ම කේන්දරයක හතර වැනි භාවය අධිපති චන්ද්‍රයා සමඟ සංයෝග වී ඇත්නම් එයින් කියැවෙන්නේ එම තැනැත්තාට ත්‍රිරෝද රථයක් හෝ යතුරුපැදියක් වැනි වාහනයක් ලැබීමට භාග්‍ය ඇති බවයි. මෙය බහුතරයක් දෙනාට පිහිටන ග්‍රහ පිහිටීමක් ලෙසද ප්‍රකටය. එසේම එවැනි යෝග යෙදී නැති එහෙත් ඊට වත්කම් ඇති පිරිස් තවමත් යතුරුපැදියක් හෝ මිලයට ගැනීම ප්‍රතික්ෂේප කරමින් සිටින අයුරුද දැකගත හැකිය.

වාහන එකක් දෙකක් හෝ කිහිපයක් තමන් සතු කරගන්නට වාසනාව ඇත්තන්ද අනන්තවත් සමාජය තුළ දක්නට ලැබෙයි. එලෙස වැඩි වාහන ප්‍රමාණයක් ලබන්නට වාසනාව උදාකරන්නට ප්‍රබල වාහන යෝග කේන්දරයේ පිහිටා තිබිය යුතුය. එවැනි යෝගද කිහිපයක් ජ්‍යොතිෂයේ සඳහන් වෙයි.

ජන්ම කේන්දරයක හතර වැනි භාවය අධිපති හතර වැනි භාවයේම සිකුරු සමඟ සංයෝග වීම නිසා බොහෝ වාහන ලැබීමේ වාසනාව උදාකෙරෙයි. එසේම යම් ජන්ම පත්‍රයක හතර වැනි භාවයේ අධිපති සිකුරු සමඟ නවවැනි භාවයේ හෝ එකොළොස්වැනි භාවයේ සිටීමෙන්ද වාහන බොහෝ ප්‍රමාණයක හිමිකරුවකු වෙයි.

ජන්ම කේන්දරයේ 1, 4, 7, 10 යන භාවයන්හි එක් ස්ථානයක හතර වැනි භාවය අධිපති උච්ච වී සිටීමද වාහන විශාල ප්‍රමාණයක් ලබාදීමට සමත්වන පොකුරු වාහන යෝගයකි. වාහන යෝග බලැති හතර වැනි භාවයේ අධිපති සහ සිකුරුට අමතරව තවත් ග්‍රහයකු සිටියි. එනම් ලග්නාධිපතිය. ලග්නාධිපති ජන්ම කේන්දරයේ 4, 9, 11 යන ස්ථානයක සිටීමද වාහන ලැබෙන යෝග බලයකි. නමුත් ලග්නාධිපති 4, 9, 11 යන ස්ථානයක සිටි පමණින්ම වාහන යෝගය ක්‍රියාත්මක නොවේ. ඒ සඳහා තවත් ග්‍රහයකුගේ උදව්වද ලග්නාධිපතිට උවමනාවේ.

යම් ජන්මියකුගේ කේන්දරයේ වාහන යෝග තිබූ පමණින්ම වාහන නොලැබේ. ඒ සඳහා තත්කාල ග්‍රහචාරයද බලවත් විය යුතුය. ඒ අනුව තත්කාලයේ හතරවැන්න අධිපති බලවත් විය යුතු අතර ගෙවන මහ දශා, අතුරු දශාද සුබ විය යුතුය. එසේම ඉතා බලවත් මුහුර්තයක් සකස් කර ගැනීමද අත්‍යවශ්‍ය කාරණයකි.

වාහන මිලට ගැනීම සහ වාහනය ධාවනය ආරම්භ කිරීමට සුබ නැකැත් සාදා ගැනීමට රවි චක්‍රය විමසීමෙන් හොඳ ප්‍රතිඵල ලබාගත හැකිය. ඒ සඳහා වාහනය මිලට ගත් වේලාව, රවි සිටි තත්කාල නැකැත බලන්න. ඉන්පසු රථය මිලදී ගත්තාගේ ජන්ම නැකැත බලාගත යුතුය. ඉන්පසු රවි සිටි නැකැතේ සිට රථය මිලදී ගත්තාගේ නැකැතට ගණන් කරන්න. නැකැත් දෙකම ඇතුළත් විය යුතුය. එවිට නැකැත් 27ක් පළමු නැකැත් දෙකම වැටීම සපලයි. ඊළඟ නැකැත් හයට වැටීම කීර්තිමත් වෙයි. ඊළඟ නැකැත් තුනට වැටීම මාරකයි. ඊළඟ නැකැත් හයට වැටෙයි නම් යහපත්. ඊළඟ නැකැත් තුනට ඇතුළත් නම් ධන හානි. ඊළඟ නැකැත් තුන නම් දුක් පීඩා. ඊළඟ නැකැත් තුන නම් සතුට සැනසුම ලැබෙන වාහනයක් උරුම වූ බව කියැවෙයි.

ජ්‍යොතිෂවේදී සත්‍යජිත් සම්පත්

LEAVE A REPLY

Please enter your comment!
Please enter your name here